Државниот секретар Николиќ во Хрватска на 38. Состанок на Мултинационалната советодавна група во РАКВИАК – Центарот за безбедносна соработка

Државниот секретар во Министерството за одбрана на Република Македонија, Драган Николиќ, ја предводи делегацијата на Република Македонија на 38. Состанок на Мултинационалната советодавна група (МАГ) во РАКВИАК – Центарот за безбедносна соработка, што денеска и утре се одржува во Ракитје, Загреб, Република Хрватска. МАГ е уравувачкиот механизам одговорен за РАКВИАК, и е составен од претставници на полноправните и придружните земји-членки, како и земјите-набљудувачи. Република Македонија е полноправна членка на оваа меѓународна организација во регионална сопственост, која е независна, непрофитна и академска организација со статус на дипломатска мисија.

Денеска на состанокот беше презентирана програмата на Центарот за 2018 година која беше усвоена од стана на земјите-членки. Беше усвоен и буџетот за следната година, а се разговараше и за состојбата со персоналот.

Државниот секретар истакна дека Република Македонија е силно посветена на регионалните иницијативи и проекти и изрази уверување дека истите претставуваат клучен принцип за стабилен и безбеден регион. Николиќ рече дека овој Центар претставува одлична платформа за различни форми на координација, соработка и дијалог, за силен одговор на современите предизвици во меѓународната безбедносна и одбранбена политика, што води кон градење на доверба и безбедност меѓу земјите-членки. Во таа насока, државниот секретар истакна дека Република Македонија ќе продолжи да ги исполнува превземените обврски од Договорот, со тоа што од 2001 година постојано упатува свој персонал, секоја година е домаќин на активности организирани од страна на РАКВИАК и партиципира во оперативниот буџет на РАКВИАК од неговото формирање.

На маргините на состанокот, државниот секретар Николиќ оствари средба со преставниците на земјите-членки на РАКВИАК, а исто така, оствари средба и со Директорот на РАКВИАК, Амбасадорот Хајдар Берк.

facebooktwittergoogle_plusredditpinterestlinkedintumblrmail