Министерката за одбрана Шекеринска на средба со словачкиот амбасадор Безак

Министерката за одбрана на Република Македонија, Радмила Шекеринска, денеска во Министерството оствари средба со амбасадорот на Словачка во Македонија, Н.Е. Мартин Безак, на која стана збор за билатералната одбранбена соработка и модалитетите за нејзино унапредување.

„Ги цениме напорите и поддршката која ја давате на нашата земја и се надеваме дека ќе возвратиме со добри резултати. Министерството за одбрана е посветено на унапредување на состојбите во Армијата, а ќе направиме и реален план за модернизација под транспарентни и некоруптивни постапки“, изјави министерката.

Министерката додаде дека ја поздравува одлуката Европската унија да го испрати експертот Рајхард Прибе, за реформите важни за членството во ЕУ и во НАТО да бидат завршени во поставените рокови. „Познат ни е глобалниот став на поддршка на Словачка за членство во НАТО, и се надеваме дека со нашата работа ќе ви дадеме аргументи таа поддршка да продолжи“, додаде таа.

Амбасадорот Безак на министерката Шекеринска и ги пренесе честитките од словачкиот министер за одбрана Петер Гајдош, за стапување на функцијата, и најави можна посета на министерот Гајдош на Република Македонија.

На средбата стана збор и за иницијативата за поставување на спомен-плоча за загинатите членови на Мониторинг мисијата на Европската Унија во 2001 година, од кои еден беше и припадник на вооружените сили на Словачка, при што министерката Шекеринска истакна дека во координација со надлежните институции, ќе биде направено сè за истото да се реализира и по 16 години и конечно да се оддаде достојна почит на загинатите.

Македонија и Словачка во областа на одбраната соработуваат од 2000 година, кога беше потпишана и Спогодбата за соработка. Истата се развива во логистиката, разузнавањето и размената на искуства во информатиката и военото воздухопловство. Еден од најразвиените сегменти на соработката меѓу двете земји е и воената едукација.

facebooktwittergoogle_plusredditpinterestlinkedintumblrmail