Министерка за одбрана на Република Северна Македонија

РАДМИЛА ШЕКЕРИНСКА

Shekerinska_biografijaРадмила Шекеринска Јанковска е актуелна министерка за одбрана и заменичка на претседателот на Владата . Во тек на нејзиниот мандат, Република Северна Македонија ја доби поканата за членство во НАТО и Протоколот за пристапување во НАТО.

Во 2002 година до 2006 година беше Заменик претседател на Владата задолжена за европска интеграција и координатор за странска помош. Токму во тек на нејзиниот мандат, нашата земја го стекна кандидатскиот статус за членство во Европската унија.

Шекеринска ги претставуваше граѓаните во највисокиот законодавен дом во тек на четири мандати (1998-2002, 2006-2008, 2008-2011 и 2011-2014). Раководеше со Националниот совет за европски интеграции од неговото основање до 2014 година. Беше член на повеќе комисии: Комисија за надворешни работи, Комисија за труд и социјална политика, Комисија за европски прашања, Комисија за млади и животна средина и Комисија за образование. Воедно, учествуваше во делегациите на Собранието за соработка со Европскиот парламент, Интерпарламентарна унија и други билатерални делегации.

Во 2009 и 2012 година, Шекеринска беше избрана за Шеф на набљудувачките мисии на ОБСЕ/ОДИХР за претседателските и парламентарлни избори во Киргистан и во Ерменија.

Во мај 2018 година, Шекеринска е одликувана од Франција со орденот „Командант на Националниот ред за заслуги на Франција“. Таа е прв политичар од Македонија што од Република Франција добива признание од овој ранг. Орденот се доделува за истакнати граѓански заслуги, а е воспоставен во 1963 година од Генералот Де Гол.

Шекеринска во 2005 стана добитник на наградата Млад глобален лидер, која ја доделува Светскиот економски форум. Наградата беше доделена за нејзиниот ангажман и посветеност на полето на европските интеграции на Западниот Балкан. Радмила Шекеринска е член на групата Munich Young Leaders формирана во рамките на Минхенската конференција за безбедност (Munich Security Conference). Беше членка на Европскиот Стратешки Форум, на Советодавниот одбор на проектот Schengen White List  и на Советот на Institute for Cultural Diplomacy.

Во 2008 година беше избрана за еден од потпретседателите на Социјалистичката интернационала (СИ), функција што ја обавуваше до 2011 година. Член е на Претседателството на Партијата на европски социјалисти (ПЕС) која ги обединува социјалдемократските, социјалистички и лабуристички партии во Европа.

Во 1999 година е избрана за потпретседател на ЦО на СДСМ и за меѓународен секретар на партијата. Во периодот 1995 – 1999 година, ја врши функцијата претседател на СДММ, а во 1997 – 1998 година е и портпарол на СДСМ. Радмила Шекеринска беше претседател на СДСМ од 2006 до 2008 година. Таа е единствената жена која досега раководела со една од големите политички партии во државава.

Шекеринска е родена на 10 јуни 1972 година во Скопје. Основно и средно образование ги заврши во ОУ “Јохан Хајнрих Песталоци” и СУ “Раде Јовчевски Корчагин”, со награди на градски, републички и сојузни натпревари по математика.

Има дипломирано на Електротехничкиот факултет во Скопје во 1995 година.

Магистер е по меѓународни односи на Флечер школата за право и дипломатија на Универзитетот Тафтс во САД.

Зборува англиски и француски јазик.

Во брак е со Божидар Јанковски и ја имаат ќерката Ада.

Анкетен лист на министерката за одбрана на Република Северна Македонија, Радмила Шекеринска линк до ДКСК

Нето плата 79.150,00 денари

facebooktwittergoogle_plusredditpinterestlinkedintumblrmail